Kjøpsvilkår

Sist oppdatert 28. september 2026

Kort fortalt: sju dagar gratis utan kort, 129 kr i månaden utan binding, og du kan seie opp når du vil.

1. Kven du handlar med

Elevé Kollektivet, drive av Elevé Valø, org.nr. 935 224 144
Nørvågvegen 9, 6090 Fosnavåg
E-post: post@eleve.no

Vilkåra gjeld kjøp i Elevé-appen (app.eleve.no). I tillegg gjeld norsk forbrukarlovgjeving, mellom anna angrerettlova og avtalelova. Vilkåra avgrensar ikkje rettane du har etter lova.

2. Tenesta

Elevé er ein digital app for pust, stille, lyd, dagbok, tapping og reiser, med Human Design som eit valfritt tillegg. Du treng ein konto med e-postadressa di. Du må vere 18 år for å inngå avtale. Kontoen er personleg og skal ikkje delast.

3. Prisar

Alle prisar er i norske kroner. Elevé Valø er ikkje registrert i Meirverdiavgiftsregisteret, så det blir ikkje lagt meirverdiavgift på prisane. Betalinga går gjennom Stripe, med kort, Apple Pay eller Google Pay.

4. Prøveperioden

Når du opprettar konto, får du sju dagar gratis tilgang til heile appen, med unntak av Human Design. Du treng ikkje leggje inn betalingskort, og prøveperioden går ikkje automatisk over til eit betalt abonnement. Når han er slutt, blir appen låst til du eventuelt startar abonnementet. Alt du har lagra, ligg trygt på kontoen i mellomtida.

5. Abonnementet

• Abonnementet blir betalt forskotsvis for éin månad om gongen og blir fornya automatisk kvar månad til du seier det opp.
• Startar du abonnementet medan du har meir enn to dagar att av prøveperioden, blir første trekk gjort når prøveperioden er over.
• Du får kvittering på e-post for kvart trekk. Alle kvitteringar finn du under Min konto → Administrer abonnement.
• Går ikkje eit trekk gjennom, prøver Stripe på nytt nokre gonger. Du får beskjed og kan oppdatere kortet under Min konto. Blir betalinga ikkje ordna, blir abonnementet avslutta.

6. Oppseiing

Du kan seie opp når du vil under Min konto → Administrer abonnement, eller ved å skrive til oss. Oppseiinga gjeld frå slutten av perioden du alt har betalt for, og du har tilgang fram til då. Vi refunderer ikkje påbyrja månader, bortsett frå når du brukar angreretten (punkt 8).

7. Human Design

Human Design er eit eingongskjøp som opnar Human Design-delen av appen for kontoen din. Du har tilgang så lenge du har konto og tilgang til appen (prøveperiode eller aktivt abonnement). Innhaldet blir levert digitalt med ein gong kjøpet er gjennomført.

8. Angrerett

Du har 14 dagars angrerett etter angrerettlova.

• Abonnementet: Angrefristen går 14 dagar frå du startar abonnementet. Angrar du innan fristen, får du tilbake heile beløpet vi har trekt, og abonnementet blir avslutta.
• Human Design: Dette er digitalt innhald som blir levert med ein gong. Før du betaler, samtykkjer du uttrykkeleg i at leveringa startar straks, og stadfestar at angreretten då fell bort (angrerettlova § 22 bokstav n). Er noko gale med innhaldet, gjeld reglane om mangel i punkt 10.

Slik angrar du: send ein e-post til post@eleve.no innan fristen. Du kan bruke skjemaet under, men det er ikkje påkravd. Vi betaler tilbake så snart som mogleg og seinast 14 dagar etter at vi fekk beskjed, med same betalingsmåte som du brukte.

9. Om innhaldet

Elevé handlar om velvære, ro og sjølvrefleksjon. Øvingane i appen, som pust, tapping (EFT) og hypnose, er sjølvhjelpsteknikkar og ikkje medisinsk eller psykologisk behandling. Dei erstattar ikkje hjelp frå lege eller psykolog. Kjennest noko for tungt, ta ein pause og snakk med nokon du stolar på eller med fastlegen din. Human Design er eit verktøy for sjølvrefleksjon og ikkje ei vitskapleg eller medisinsk vurdering.

10. Feil og manglar

Fungerer ikkje appen slik han skal, ta kontakt på post@eleve.no, så rettar vi det. Er tenesta ute av drift over lengre tid, eller har innhaldet ein mangel vi ikkje rettar, kan du ha krav på prisavslag eller heving etter forbrukarkjøpslova og ulovfesta tenesterett. Vi kan utvikle og endre innhaldet i appen, men vil ikkje ta bort det som er kjernen i det du har betalt for.

11. Prisendringar og endringar i vilkåra

Endrar vi prisen på abonnementet, varslar vi deg på e-post minst 30 dagar før den nye prisen gjeld for deg. Du kan då seie opp før endringa trer i kraft. Vesentlege endringar i vilkåra varslar vi på same måte.

12. Avslutning frå vår side

Vi kan stengje ein konto som blir misbrukt, til dømes ved deling av kontoen, forsøk på å omgå betaling eller åtak på tenesta. Om det gjeld ein konto med aktivt abonnement, varslar vi deg først når det er mogleg, og refunderer betalt, ubrukt periode dersom stenginga ikkje skuldast brot på vilkåra.

13. Personvern

Korleis vi handsamar opplysningane dine, står i personvernerklæringa.

14. Klage og tvist

Ta kontakt med oss først. Vi ønskjer å finne ei god løysing. Kjem vi ikkje til semje, kan du klage til Forbrukarrådet, som kan mekle mellom oss. Saka kan deretter bringast inn for Forbrukarklageutvalet. Avtalen er underlagd norsk rett.

Sjå òg personvernerklæringa. · Tilbake til appen